InicioEconomíaA pescada do pincho e o bonito de Burela "fan" o Camiño...

A pescada do pincho e o bonito de Burela “fan” o Camiño por sete comunidades da man de Paradores

Ao longo das próximas dez semanas, establecementos da rede ofrecerán receitas especiais cos dous produtos estrela do porto burelao

Publicada o

- Advertisement -

A Organización de Produtores Pesqueiros de Lugo e Paradores presentaron este mércores no Parador de Santiago de Compostela Hostal dos Reis Católicos a súa nova campaña de promoción “Orixe & Destino Galicia”.

Trátase dunha nova edición ampliada da campaña que OPP Lugo realizou o pasado ano en colaboración coa rede de Paradores de Turismo de España e segue gardando unha vinculación moi especial coas diferentes rutas do Camiño de Santiago, combinando a gastronomía e a calidade do produto pesqueiro mariñao.

Nesta ocasión o protagonismo da campaña será para dúas das principais especies da lonxa de Armadores de Burela, S. A. (Absa), que tamén colabora nesta iniciativa: a pescada do pincho e o bonito do norte. A iniciativa celebrarase durante as dez próximas semanas nos restaurantes de dez paradores, que ofrecerán diferentes receitas especiais elaboradas polos seus xefes de cociña.

“ORIXE E DESTINO GALICIA”

Esta promoción denomínase “Orixe e Destino Galicia” porque a pescada e o bonito saen de Burela e volven a Galicia seguindo o Camiño de Santiago a través dos restaurantes de paradores que están ubicados en diferentes rutas xacobeas: o Camiño Mozárabe, a Vía da Prata, o Camiño de Madrid, o Camiño Norte, o Camiño Francés e o Camiño de Fisterra. Os paradores participantes este ano pertencen a sete comunidades autónomas diferentes: Parador de Granada (Andalucía); Parador de Mérida (Extremadura); Parador de Olite (Navarra); Paradores de La Granja e de Villafranca del Bierzo (Castela e León); Parador de Santillana del Mar (Cantabria); Parador de Cangas de Onís (Asturias); e Paradores Costa da Morte e Santiago de Compostela (Galicia), que este ano abre e pecha a campaña con sendas xornadas do bonito e da pescada.

A “Ruta Xacobea do Bonito de Burela” comeza este fin de semana no Parador de Santiago de Compostela e continúa os seguintes tres fins de semana en Olite, Santillana do Mar e Villafranca do Bierzo. A “Ruta Xacobea da Pescada do Pincho de Burela” comezará o 20 de agosto en Granada para seguir visitando Mérida, Segovia, Cangas de Onís e Muxía, para pechar o círculo de novo en Santiago de Compostela.

BURELA, CAPITAL PESQUEIRA

No acto participaron Sergio López, xerente de OPP Lugo; Santiago Carrera, director
do Parador de Santiago; e Rosa Quintana, Conselleira do Mar da Xunta de Galicia. Ademais da OPP Lugo, coa presenza do seu presidente Juan José Otero, no acto tamén estiveron Abelardo Basanta e Miguel Neira, presidente e xerente de Armadores de Burela, que tamén colabora na campaña, e Mercedes Rodríguez, Directora Xeral de Pesca da Xunta de Galicia.

López, sinalou a importancia de Burela como “capital nacional” da pesca da pescada do pincho e como “capital galega” da pesca do bonito do Norte; exemplo ademais de “máxima selectividade na pesca artesá“, xa que son dúas especies que se pescan individualmente con anzol.

“XOIAS GASTRONÓMICAS” E “ALIMENTOS IDEAIS”

Tamén destacou á pescada do pincho e o bonito do norte como produtos pesqueiros de primeira calidade, peixes branco e azul como bo exemplo da súa variedade e riqueza tanto na cociña clásica como máis elaborada. Dúas auténticas “xoias da gastronomía” que ademais representan un “alimento ideal” para dietas equilibradas e un estilo de vida saudable.

Carrera, pola súa banda, explicou a importancia dos produtos gastronómicos na rede de Paradores, “que aposta por unha cociña de proximidade quilómetro cero, tradicional e de primeira calidade, tres requisitos que cumpren o bonito e a pescada do pincho
de Burela”.

Finalmente, Quintana destacou a importancia da frota de Burela, reflexada aquí en dúas das súas especies máis representativas, e celebrou este tipo de iniciativas que axudan
a fomentar o consumo de peixe e que a Xunta de Galicia financia a través das axudas FEMP, e que ademais neste caso vincúlase ás diferentes rutas do Camiño de Santiago.

SHOWCOOKING E DEGUSTACIÓN

Trala presentación ofreceuse un showcooking no que se cociñaron en vivo as receitas de “Bonito de Burela en escabeche” e “Pescada do Pincho de Burela con vinagreta de tomate negro de Santiago”. Esta acción enmárcase dentro das accións de promoción de OPP Lugo incluídas no seu Plan de Produción e Comercialización anual e contan coa cofinanciación da Xunta de Galicia e o Fondo Europeo e Marítimo da Pesca.

ÚLTIMAS

Erika Gomes Mendes: “Fixen un traballo para saber se os caboverdianos coñecían algo de Galicia antes de vir”

-Erika, cando chegaches a Burela desde o teu país? Cheguei a Burela en 2017 e...

‘A Sacabeira’ celebrará o Día de Rosalía o 25 de febreiro en Sargadelos

O vindeiro 25 de febreiro, no Café Bar Cultural A Sacabeira, a ACR Fervenza  de Sargadelos celebra...

Denuncian que o Hospital de Burela queda só cun cardiólogo

A CIG-Saúde da Mariña denuncia que o hospital queda cun só especialista en cardioloxía...

Trabada solicita unha subvención para as cubertas do CEIP Celso Currás

O Concello de Trabada solicitou unha subvención á Xunta de Galicia para a mellora...