Alcoa non se presentou á reunión telemática convocada na tarde-noite deste mércores polo Goberno central, xuntanza na que ían participar a multinacional, representantes das organizacións sindicais –CIG, CC OO e UGT-, Xunta de Galicia, Goberno estatal e o potencial comprador do complexo industrial de San Cibrao, Liberty House/GFG Alliance.

A ausencia da propietaria da planta de aluminio, para a que presentou un Expediente de Regulación de Emprego (ERE) que suporía 534 despedimentos na fábrica e outros 400 en empresas auxiliares, rebenta calquera posible avance na reunión de hoxe. A multinacional cínguese ao período de consultas do despedimento colectivo, que se retomará mañá xoves no restaurante lucense de Los Robles, ás 10.00 horas.

A falta de quen ten a última decisión sobre a factoría supón un revés para os traballadores, que retomarán as conversas -logo dun receso dun día- nunha posición complicada. Os sindicatos solicitaran o amparo das Administracións ante a insistencia de Alcoa en parar as cubas, medida que supón para as centrais a liña vermella, pois entenden que o apagado da maquinaria de electrólise sería a morte da fábrica.

As centrais pediron unha tregua, logo de máis de 30 horas de negociación, para poder revisar a acta de desacordo presentada pola compañía. Que non se asinase o mencionado documento permitiu gañar tempo para convocar a todas as partes, pero tras deixar ‘plantadas’ ás Administracións Alcoa semella rebentar calquera posibilidade dunha venda coas cubas operativas.