Os densos bancos de néboa que dificultan a visibilidade e condicionan a seguridade dos usuarios obrigaron á Dirección General de Tráfico (DGT) a cortar ao tráfico, en ambos sentidos da circulación, a Autovía do Cantábrico (A-8) ao seu paso polos municipios lucenses de Mondoñedo e Abadín.
A autovía permanece cortada desde as 12.07 horas deste luns como consecuencia da néboa no Alto do Fiouco, concretamente no tramo comprendido entre os quilómetros 536 e 552.
Como vén sendo habitual nestes casos, habilitáronse os correspondentes desvíos alternativos pola estrada Nacional 634 ao seu paso polo municipio de Mondoñedo.
Durante a pasada fin de semana, a autovía xa estivo cortada ao tráfico puntualmente, e, nos momentos en que permaneceu aberta, mantívose con advertencias aos condutores por falta de visibilidade.
