Os representantes de GFG Alliance – Liberty House, a multinacional interesada na adquisición da planta de Alcoa San Cibrao, citaron aos representantes do comité de empresa da factoría da Mariña Lucense na sé dunha empresa enerxética en Madrid para a reunión que manterán mañá pola tarde.
En concreto, ese encontro producirase na sé da empresa Ignis Energy, situada na rúa Marcelo Spínola, en Madrid, a partir das 17.00 horas.
O presidente do comité, José Antonio Zan, recoñeceu en declaracións á prensa que viaxan a Madrid coa esperanza de coñecer un “un plan de viabilidade, un plan de investimentos e un plan enerxético“, para facerse tamén á idea de cal será o camiño do complexo industrial no futuro, en canto á produción, ao diñeiro que hai que investir para facer viable a planta e con respecto ao marco da enerxía, para que fabricar aluminio sexa rendible na Mariña.
Zan confía en regresar da capital con “compromisos” por parte desa multinacional “por escrito e asinados”, porque o que busca o comité neste momento é “certeza sobre a produción” na fábrica de aluminio primario de San Cibrao e, consecuentemente, sobre o mantemento dos postos de traballo.
En canto ao posible comprador da fábrica, Zan dixo que é “unha empresa industrial que sabe o que hai que facer”, polo que espera que os seus representantes transmitan certezas aos traballadores nesa reunión.
