O conselleiro de Industria, o popular Francisco Conde, asegurou sobre o proceso de compra-venda da planta de aluminio de San Cibrao que nin Goberno central nin Xunta de Galicia albiscan “outro escenario que non sexa” que Alcoa, a propietaria, e Liberty House, a potencial compradora, “cheguen a un acordo”.

De non concretarse un pacto antes do 28 de setembro, ese día a multinacional estadounidense e os sindicatos retomarían o período de consultas do Expediente de Regulación de Emprego (ERE) presentado pola titular. Alcoa acusou a Liberty House en reiteradas ocasións de frear o proceso con “demandas non razoables”, mentres que comité e sindicatos -CC OO, CIG e UGT- atribúen á propietaria da factoría “mala fe” na negociación, pois entenden que ten a vontade non deixar producir aluminio nas instalacións.

Tras reivindicar que ambas as Administracións poñen a disposición de Alcoa e Liberty “todos os mecanismos facilitadores” para ese fin, pediulles “que acheguen posturas e poidan desenvolver” ese acordo que entende que “é posible”. Toda a información no Galicia Confidencial.