O Parlamento de Galicia pediu este mércores por unanimidade ao Goberno central que se comprometa a que as instalacións de Alcoa en San Cibrao e os proxectos industriais pensados para as mesmas poidan optar ao fondo europeo de recuperación.

Así o recolle unha proposición non de lei presentada polo PPdeG, que contou co apoio dos dous grupos da oposición e a través da cal o Lexislativo galego tamén reclama ao Executivo central que fixe “dunha vez por todas un prezo eléctrico competitivo” para a industria mediante medidas como a aprobación dun estatuto electrointensivo, o incremento dos pagos por CO2 ou un novo sistema de xestión da demanda.

A deputada do PPdeG Elena Candia manifestou que esta é unha semana “decisiva” para o futuro da actividade industrial en San Cibrao polas negociacións para a venda das fábricas de Alcoa ao grupo Liberty House e que, neste contexto, non se entendería que non se actuase “pola defensa da continuidade dos postos de traballo” e a produción de aluminio.

Candia criticou que o Goberno central “faltou á súa palabra en numerosas ocasións” en relación ao futuro de Alcoa e, en “tempo de desconto” para o desenlace desta cuestión, reclamou apoio para esta iniciativa de modo que se faga todo o posible por asegurar o seu futuro.

REXEITADO UN PLAN INDUSTRIAL PARA A MARIÑA

O PPdeG captou o voto favorable do grupo socialista, malia que non foi aceptada a emenda presentada e que engadía ao corpo orixinal da iniciativa dous puntos adicionais con deberes para a Xunta de Galicia.

Entre eles estaban un chamamento a seguir traballando na mesa multilateral creada para chegar a resultados que garantan a continuidade da central e o desenvolvemento dun plan industrial “para promover a actividade económica e laboral” en toda a comarca da Mariña.

O portavoz de Industria do PSdeG-PSOE, Martín Seco, trasladou que apoiaron a proposición non de lei popular porque, “malia estar completamente errada no tempo“, recolle preceptos positivos para o futuro da planta.

O BNG RECLAMABA A INTERVENCIÓN DA PLANTA

O PPdeG tamén puido contar co apoio dun BNG que tamén viu rexeitada a súa enmenda, esta vez de substitución, e que modificaba o texto orixinal para incluír novas demandas como unha posible intervención pública da central “en caso dunha negativa á venda” para “que se garanta a continuidade da actividade e dos postos de traballo”.

A parlamentaria nacionalista Noa Presas tamén suscitou esta posibilidade para o caso de que se trunque o funcionamento de Alu Ibérica, antiga sé de Alcoa na Coruña, ademais de lanzar de novo a proposta de creación dunha tarifa eléctrica galega, que non apoiou ningún dos outros grupos.

Presas cargou contra a xestión en política industrial do PPdeG en Galicia e contra “a súa estratexia de autoexculpación permanente”, á vez que responsabilizou da situación que se vive actualmente na Mariña ás decisións tomadas en décadas recentes por diferentes gobernos populares.

O GOBERNO FALA DE NOVO DO ESTATUTO, PERO NON CONCRETA UNHA DATA

Segundo informa Efe, o secretario xeral de Industria do Ministerio de Industria, Comercio e Turismo, Raül Blanco, asegurou este martes que o estatuto para a industria electrointensiva, que está nos últimos trámites previos á súa aprobación, “vai chegar ao máximo do que permita a normativa comunitaria” para recudir a factura que pagan este tipo de empresas.

Durante a súa intervención nun encontro telemático organizado pola FSA-PSOE no que tamén participaron o conselleiro de Industria, Enrique Fernández, e a directora xeral de Industria do Principado, Rosana Prada, Blanco afirmou que o estatuto “vai ser un marco máis que favorable e moi positivo para toda a industria electriointensiva”, no caso de Asturias “desde o máis grande aos máis pequenos”.

O novo marco normativo, engadiu, vai contar con “unha dotación orzamentaria que vai ser maior que a que nunca haxa para a industria electointensiva”.

Segundo Blanco, co novo estatuto e outros instrumentos como as compensacións por emisións indirectas de CO2 ou o fondo español de reserva de garantía para entidades electrointensivas, esta industria vai contar cuns instrumentos que van permitir reducir o “gap” (fenda) de prezos con outros países da Unión Europea (UE).

Blanco avanzou o pasado 9 de setembro no Congreso que é previsible que o novo estatuto electrointensivo poida aprobarse en outubro.

“Estamos facendo unha política que nunca se fixo respecto de esta industria” porque era “unha política pendente”, defendeu hoxe o representante do Ministerio, quen tamén se mostrou partidario de establecer mecanismos de axuste en fronteira para gravar a entrada de produtos siderúrxicos de terceiros países con menores esixencias medioambientais que as impostas na UE.