EFE. O comité de empresa de Alcoa San Cibrao agarda que o Tribunal Superior de Xustiza de Galicia (TSXG) dicte esta semana unha resolución con respecto ás medidas cautelares solicitadas polos sindicatos CC OO, UGT e CIG en relación co Expediente de Regulación de Emprego (ERE) que pretende aplicar a multinacional, e que deixaría na rúa a 524 traballadores de persoal e a outros alomenos 400 das empresas auxiliares.
Entre outras medidas, na cautelar, cuxa solicitude foi avaliada nunha vista oral o pasado 28 de outubro, pídese a paralización do despedimento colectivo presentado por Alcoa, así como que se lle impida á multinacional apagar as cubas de electrólise, ata que haxa por parte dos tribunais unha sentenza sobre o proceso de despedimento colectivo.
O presidente do comité de empresa de Alcoa San Cibrao, José Antonio Zan, opina que na vista celebrada a semana pasada na Coruña quedou “moi claro” que a multinacional norteamericana busca “facer dano ás instalacións e aos traballadores”, para que “nunca máis se volva a producir aluminio primario en España”.
Por outra banda, o presidente do comité de empresa tamén lles recordaba aos Gobernos central e autonómico que, neste momento, non poden eludir as súas responsabilidades e fiar o futuro da fábrica e de centos de postos de traballo a unha decisión xudicial.
El laudo arbitral en contra de la parada de las cubas de Alcoa y que da la razón a los trabajadores es una buena noticia. Seguiremos defendiendo la continuidad de esta industria estratégica y de sus empleos. https://t.co/eQdE3c9jor vía @XornaldaMarina
— Reyes Maroto (@MarotoReyes) October 30, 2020
“OS POLÍTICOS TEÑEN QUE FACER O SEU TRABALLO”
Despois de pronunciarse a ministra de Industria, Reyes Maroto, a través das redes sociais celebrando o laudo arbitral do Consello Galego de Relacións Laborais que nega a Alcoa a parada das cubas e dá a razón ao comité sobre as condicións da folga indefinida que continúa no complexo industrial, os traballadores insisten en que non hai outra solución que a política para o conflito laboral.
Zan dixo que “está ben que os xuíces decidan” sobre unha paralización cautelar dese ERE que podería deixar na rúa case un milleiro de traballadores e supoñer a “morte” da planta, pero insiste en que o futuro da fábrica e da produción de aluminio pasa por “unha decisión política“.
De feito, considera que o que está sucedendo, en realidade, é que “un estado de dereito está sendo atacado por unha multinacional”. Recorda que o comité e o persoal “xa fixeron o seu traballo. Un gran traballo durante moitos meses”, pero agora son os políticos quenes “teñen que facer o seu”.
CINCO PERSOAS COMO MÁXIMO NO CAMPAMENTO
Ante a situación epidemiolóxica na Mariña, con concellos como o de Viveiro e Cervo en alerta vermella por Covid-19, o comité decidiu que serán os sindicatos quenes manterán sempre a cinco persoas como máximo no campamento da folga indefinida. Por iso, pídese aos traballadores que non acudan sen antes estar apuntados para realizar a garda correspondente.
Ademais, “rógase ao persoal que manteña a distancia de seguridade” e a “máscara posta”.
