O vicepresidente segundo da Xunta de Galicia, Francisco Conde, asegurou que o Goberno galego “ten claro” que en caso de “situación de non retorno” co despedimento de máis de 500 traballadores da fábrica de aluminio de Alcoa San Cibrao, en Cervo, unha medida que implicaría a perda doutros 400 empregos na industria auxiliar, deberase proceder a unha intervención.
No entanto, avogou por que, antes diso, se esgoten “todas as vías desde o punto de vista legal e xurídico” con respecto ao expediente regulador de emprego (ERE), que será obxecto dun xuízo no Tribunal Superior de Xustiza de Galicia (TSXG) o próximo 3 de decembro; á vez que recordou que aínda permanece a man tendida para que a multinacional acceda á venda da planta de aluminio a Liberty House.
A EMPRESA NON CONFIRMOU SE PARTICIPARÁ NA MESA MULTILATERAL, O VINDEIRO LUNS
Neste sentido, Alcoa está chamada polo Goberno central a participar na mesa multilateral que abordará o vindeiro luns -18.00 horas, vía telemática- o futuro da planta de aluminio, xunto a comité de empresa, sindicatos a nivel estatal, Xunta de Galicia e Ministerios de Industria e Transición Ecolóxica.
Todo iso manifestouno Conde durante unha entrevista concedida este domingo a Radio Nacional, na que se reafirmou en que se Alcoa “se segue opoñendo” a todas estas solucións, “chegará o momento da intervención”.
Pero iso sería, matizou o tamén conselleiro de Economía, Empresa e Innovación, unha vez celebrado este xuízo no que espera “que se poida atender á reclamación dos traballadores e se poida impugnar o ERE”, un asunto no que a Avogacía do Estado e a Asesoría Xurídica da Xunta “traballan conxuntamente“.
“Os traballadores teñen a dúas Administracións defendendo os seus dereitos e non imos deixar, loxicamente, ningunha físgoa para que se logre ese obxectivo final de garantir o mantemento do emprego e da actividade”, sentenciou Conde.
OS OBREIROS PIDEN QUE NON SE DEIXE “UN PROBLEMA POLÍTICO” NA MAN DOS XUÍCES
Os traballadores solicitaron o pasado venres, unha vez máis, ás Administracións que “non deixen un problema político en mans dos xuíces, que non poden ofrecer unha solución” ao conflito laboral.
