O vicepresidente segundo da Xunta, Francisco Conde, espera “poder seguir avanzando” nunha solución para os traballadores da planta de Alcoa co xuízo que se celebra o xoves para dirimir a impugnación do expediente de regulación de emprego (ERE).
“Seguimos nun novo capítulo desta viaxe a ningunha parte de Alcoa, que lamentablemente se mantén na confrontación e non acepta traballar en solucións que permitan dar viabilidade á planta e unha resposta ao interese xeral, que é o mantemento dos postos de traballo“, destacou o tamén conselleiro de Economía, en declaracións aos medios de comunicación en Lugo.
“Nós imos seguir defendendo o posicionamento, farémolo o xoves nese xuízo”, agregou. Así, esperou poder “seguir avanzando precisamente para atopar unha solución que pasa por que Alcoa permita manter eses postos de traballo”. Os traballadores “saben que poden contar co apoio da Xunta e do Goberno de España, seguimos traballando de forma conxunta”, apostilou.
Cuestionado sobre se ve marxe para que a empresa rectifique, afirmou que o Executivo galego continúa coa “man tendida”, pero constatou que iso é “unha opción que depende de Alcoa”. “Tanto o Goberno de España como a Xunta trasladamos a nosa vontade de poder chegar a un acordo para retomar esas negociacións para a venda da planta e iso é unha decisión que terá que tomar Alcoa”, resolveu.
Deste xeito, concluíu que “a mellor solución é atopar un acordo” co que gañarían “todos” e non se estaría “nesta situación” co conflito nos xulgados.
Esta prohibición establécea para dar garantías a unha eventual reincorporación dos traballadores no caso de que o ERE sexa tombado pola xustiza.
