EFE. Centos de traballadores de Alcoa concentráronse este xoves na entrada principal da fábrica de San Cibrao para seguir, a través dunha pantalla e coa axuda de altofalantes, o desenvolvemento do xuízo que se está celebrando pola demanda contra o proceso de despedimento colectivo no Tribunal Superior de Xustiza de Galicia (TSXG).

Despois de que se confirmase que o xuízo ía celebrarse, ao non haber acordo entre a empresa e o comité no acto de conciliación previo ao comezo da vista oral, os traballadores -que continúan coa folga indefinida iniciada no pasado mes de outubro- cortaron o acceso principal á fábrica con barricadas de rodas, ás que logo lles prenderon lume.

Tamén queimaron os carteis de Alcoa situados na mesma entrada ao complexo industrial, cerca do campamento montado polo comité para controlar os accesos e saídas da fábrica desde que comezou a folga indefinida, no mes de outubro.

De novo volveron escoitarse consignas a favor dunha intervención pública da fábrica e en contra da multinacional americana.