O comité de Alcoa San Cibrao anunciou este luns que o vindeiro mércores, 16 de decembro, celebrará fronte á casa da cultura de San Cibrao, na coñecida como a ‘Prazoleta’, unha concentración conmemorativa da parada das cubas de electrólise polo incidente do Casón, no ano 1987.
Trátase dun novo acto de protesta do persoal do complexo industrial de San Cibrao e da industria auxiliar ante o expediente de regulación de emprego (ERE) presentado pola multinacional na fábrica de aluminio, que suporía o despedimento de 524 traballadores, o apagado da maquinaria e tamén, segundo a estimación dos sindicatos, unha perda doutros alomenos 400 empregos nas empresas contratistas. Trala celebración do xuízo pola impugnación do despedimento colectivo, os obreiros agardan a decisión do Tribunal Superior de Xustiza de Galicia (TSXG) sobre o mesmo.
Neste caso, a nova protesta non pode ser máis simbólica. O conflito laboral do Casón acabou coa parada das cubas de electrólise e o despedimento dos 23 integrantes do comité de empresa, que en decembro do 1987 negaranse á entrada ao complexo industrial de San Cibrao dos bidóns que almacenaba o buque, que embarrancara en Fisterra.
DESPEDIUSE AO COMITÉ AO COMPLETO E UN ERE AFECTOU A UNS 600 TRABALLADORES
A suposta toxicidade dos barrís e a confusa información comunicada polas Administracións provocou unha estampida social na Costa da Morte, decidindo as autoridades desfacerse dos bidóns por mar, vía o porto sancibrense. Tras momentos de tensión no complexo industrial, que acabaron cun desacordo entre a empresa -daquela estatal- e os sindicatos, a maquinaria apagouse e executouse un ERE que afectou a case 600 traballadores. A maioría deles recuperaron o posto máis adiante, no proceso de rearrincado das cubas, pero non así os 23 sindicalistas. Na Mariña quedou a memoria do “Nadal máis triste” da historia recente da comarca.
O conflito laboral do Casón reflectiu a importancia da produción de aluminio para a comarca da Mariña, unha relevancia que os obreiros queren poñer de novo de manifesto.
