O Goberno central levará mañá, martes 15 de decembro, o estatuto do consumidor electrointensivo ao Consello de Ministros, segundo adiantou a ministra de Industria, a socialista Reyes Maroto, a través de Twitter. Así, asegurou que desde o 1 de xaneiro de 2021 terase “un marco necesario de certeza e seguridade” no tocante ao prezo da enerxía eléctrica “para garantir as capacidades produtivas das empresas e trazar os seus proxectos de investimento”.

Mañana el Gobierno aprobará el Estatuto de los consumidores Electrointensivos, que beneficiará a más de 600 empresas y 300.000 trabajadores, elaborado conjuntamente por @mincoturgob y @mitecogob. Una buena noticia que he compartido en los premios #TinteroySecante2020 de @APIE_es pic.twitter.com/mEtXnIFqPb

— Reyes Maroto (@MarotoReyes) December 14, 2020

O documento, considerado chave para o futuro do complexo industrial de San Cibrao, chegará despois de case dous anos de prazos incumpridos por parte do Executivo central.

Por agora, Maroto só confirmou que se beneficiarán do estatuto “máis de 600 empresas e 300.000 traballadores”. Descoñécese o contido do mesmo e se o Executivo central aceptou as alegacións formuladas tanto polos sindicatos de Alcoa San Cibrao como polas comunidades autónomas de Galicia, Asturias e Cantabria.

A necesidade dun marco estable, precedible e duradeiro no tempo, para o prezo da enerxía é unha das principais demandas da industria electrointensiva, especialmente na planta de aluminio de San Cibrao, onde Alcoa presentou un expediente de regulación de emprego (ERE) que foi impugnado polos sindicatos e sobre o que se agarda resolución por parte do Tribunal Superior de Xustiza de Galicia (TSXG).