Goberno e Xunta discrepan sobre o acordo da UE para as cotas, cun recorte do 5% para a pescada sur

Bruxelas prorroga tres meses as posibilidades de pesca das especies de xestión compartida co Reino Unido, cun 25% do TAC de 2020 para a pescada norte e un 65% para xarda, lirio ou xurelo

Porto de Celeiro. TURISMO DE GALICIA

EFE. Os Vinte e sete países membros da Unión Europea (UE) lograron este xoves, tras case 24 horas ininterrompidas de negociacións, pechar un acordo sobre o reparto anual dos Totais Admisibles de Capturas (TAC) e cotas pesqueras do Atlántico e o Mar do Norte e o plan para o Mediterráneo.

España conseguiu reducir do 12,8% ao 5% o recorte proposto para a pescada sur, así como do 40% ao 20% a do linguado nas mesmas augas -a rebaixa será dun 7% en área francesa-, e moderar do 15% ao 7,5% a redución de actividade suscitada no marco do plan de recuperación do Mediterráneo Occidental. En augas de Francia, a redución será do 7%.

Ademais, tamén sobe -un 3,5%- o TAC da anchoa no Cantábrico, ata as 33.000 toneladas debido ao “excelente estado biolóxico da especie”.

No caso do xurelo, a delegación española conseguiu aumentar un 5% o TAC, ata as 31.834 toneladas.

Para os galos e rapes do sur aprobáronse recortes (do 11% e o 13%, respectivamente) pero, segundo Planas, a contía será “suficiente para garantir a actividade en 2021”.

En canto á cigala do Golfo de Cádiz, a tesoira quedou finalmente no 15%, fronte ao 20% inicialmente proposto por Bruxelas, o que permitirá a pesca de 94 toneladas. En augas de Portugal, o recorte será próximo ao 4%.

No caso da cigala do Cantábrico, con todo, seguirá pechada a pesquería, pero Planas explicou que Bruxelas e España comprometéronse a seguir traballando para solicitar unha revisión da recomendación científica para esa zona, á luz dos bos resultados da campaña.

O MINISTERIO: “É UN RESULTADO SATISFACTORIO DADAS AS CIRCUNSTANCIAS”

“É un resultado satisfactorio se se teñen en conta as circunstancias”, dixo ao remate da reunión en roda de prensa o ministro español de Agricultura, Pesca e Alimentación, Luís Planas.

“Melloramos as propostas presentadas. Foron unhas negociacións longas, intensas e complicadas. É un bo acordo sobre as posibilidades pesqueiras da frota española para 2021”, dixo o ministro.

Os ministros de Pesca da Unión Europea comezaron o martes a negociación de tres reglamentos: os Totais Admisibles de Capturas e cotas no Atlántico e o Mar do Norte, así como os das augas profundas (2021-2022) e o plan de recuperación da pesca no mar Mediterráneo.

Planas indicou que o tramo final das negociacións sobre a relación co Reino Unido tralo Brexit e a crise da Covid-19 condicionaron a reunión.

Como consecuencia do Brexit, na reunión negociáronse 26 pesquerías e deixouse separadamente o reparto de 119 especies pesqueiras de xestión compartida co Reino Unido, incluída a pescada do norte, o rape ou o galo en augas do norte, á espera de que conclúan as negociacións e o eventual acordo de pesca.

Con todo, decidíronse as condicións para permitir que os buques europeos sigan faenando a partir do 1 de xaneiro.

A solución atopada é permitir que eses barcos poidan dispoñer no primeiro trimestre de 2021 dun 25% dos TAC establecidos para o ano 2020 das poboacións compartidas, entre as que se atopan especies tan importantes para a frota española como a pescada do norte.

Nalgunhas das especies, como a cabala, o lirio e o xurelo, aumentarase ata o 65% do TAC durante eses tres meses. “A decisión é unha boa base de partida”, indicou Planas.

QUINTANA: “NON HOUBO SENSIBILIDADE CO SECTOR”

“Galicia fai un balance negativo, os resultados acadados son extremadamente cativos. Cremos que houbo pouca sensibilidade por parte da Comisión Europea cun sector declarado esencial en plena pandemia, e que ve como ten poucas compensacións aos esforzos para acadar que a maioría dos stocks que traballa estean en Rendemento Máximo Sostible (RMS)”, xulgou a conselleira de Mar, Rosa Quintana.

“A situación que se nos vén enriba co Brexit e con escasas posibilidades de pesca no caladoiro nacional é complexa”, asegurou Quintana, que si valorou os acordos para reducir o recorte da pescada sur e “que haxa a posibilidade de avaliar no mes de maio a cigala do Cantábrico para a súa apertura posterior”.

OS ARMADORES: “ESPAÑA VAI PESCAR MENOS EN 2021 CA EN 2020”

“É un fracaso total. España vai pescar menos en 2021 que en 2020 nos caladoiros afectados polo acordo; a CE tivo unha falta de sensibilidade incrible, abandonou aos pescadores e deixouse levar polas consignas ecoloxistas”, recalcou o secretario xeral de Cepesca (Confederación Española de Pesca), Javier Garat.

RESPOSTAR

Please enter your comment!
Please enter your name here