Traballadores das empresas auxiliares de Alcoa San Cibrao marcharon este venres, a primeira hora da mañá, desde as casetas das contratistas ata a porta da fábrica para amosar o seu apoio ao sindicalista Kike Rocha, traballador de Cotelsa que segundo denunciou a CIG está a sufrir “acoso á súa liberdade sindical”.
A central explicou que Rocha, que exerce como voceiro da plataforma que aglutina a representación sindical nas auxiliares, foi retirado do posto que ocupou durante sete anos e recolocado en traballos de menor cualificación, para os que non ten formación, “a partir das negociacións do Expediente de Regulación de Emprego (ERE)” con Alcoa.
O vindeiro luns, ás 11.00 horas, está previsto que se celebre en Lugo o xuízo. Os traballadores avanzan que farán unha concentración ante o xulgado para denunciar de novo a “represión sindical” ao seu compañeiro.
