O Ministerio de Industria remitiu unhas declaracións do secretario xeral de Industria e Peme, Raül Blanco, a última hora da tarde nas que se refire a un escenario “moi claro”, con “empresas interesadas na compra da planta de San Cibrao, empresas industriais”.
Neste contexto sinalou que “o principal é que Alcoa estableza conversacións con elas e expoña unha operación de venda viable á cal o Goberno, a través de todos os seus instrumentos, daralle apoio”. Ata agora, tanto o Goberno central como a Xunta e o comité de empresa centráronse no interese de Liberty por facerse coa planta de aluminio.
“Quen ten que facer esa función, traballar esa operación de venda, é o propietario, que é Alcoa”, subliñou Blanco, tras referirse a contactos pero sen explicar a súa ausencia na mesa multilateral.
Con todo, o Executivo central, dixo, está “aberto a colaborar, a facilitar calquera acción que sexa necesaria para que esa venda sexa unha realidade o máis pronto posible”, e avoga por colaborar tamén coa Xunta para iso e co obxectivo último de que Alcoa “deixe de facer sufrir á Mariña”.