Comezaron xa as obras de mellora da estrada provincial LU-P-5506 de Augaxosa a Trabada. Unha obra, que permite que a principal vía de comunicación do municipio mariñano coa capitalidade da provincia quede completamente renovada con aglomerado en quente.
O Presidente da Deputación de Lugo, José Tomé Roca, xunto á Deputada de Réxime Interior, Promoción do Territorio e Turismo, Pilar García Porto, e o Deputado de Promoción Económica e Social, Pablo Rivera Capón, acompañados da alcaldesa de Trabada, Mayra García Bermúdez, supervisaron os traballos de renovación da estrada.
A institución provincial inviste 152.500€ nesta vía que percorre os concellos de Trabada, A Pontenova e Lourenzá, e é a principal vía de comunicación do municipio trabadense coa capitalidade da provincia. Estas melloras permitirán que a vía quede renovada de maneira íntegra co estendido de aglomerado en quente. Anteriormente realizouse a limpeza de cunetas.
“Esta actuación dá resposta a unha demanda histórica da veciñanza da zona, que reclamaban a remodelación desta estrada LU-P-5506, por ser a vía que conecta con Lugo cidade. Desta mellora tamén se beneficiarán moitos veciños e veciñas do centro da provincia que empregan esta estrada para acudir ás praias da Mariña”, apuntan desde a institución provincial.