O deputado do BNG no Congreso, Néstor Rego, reclamou ao Goberno central e á Xunta “que saian da súa posición inmovilista” con respecto ás negociacións para a venda da planta de aluminio de Alcoa en Cervo, onde aposta pola intervención pública “como única medida realmente eficaz” para garantir o futuro industrial.

“Os últimos acontecementos certifican que esta é a vía para posibilitar que Alcoa San Cibrao continúe coa actividade e coa totalidade dos postos de traballo”, advertiu o nacionalista, tras a reunión da ministra de Industria, Reyes Maroto, en Pittsburgh co presidente da multinacional.

Respecto diso, o deputado do Bloque evidenciou que “a ministra anunciou que a empresa estaba disposta a vender de maneira directa, cousa que foi desmentida pola dirección” da empresa. Así as cousas, vese ante “a situación anterior”, na que traballadores e empresa “entenden que a mellor opción é que a SEPI actúe como intermediaria e a partir de aí buscar un comprador que garanta un proxecto industrial”.

Por iso, o BNG reclama “unha vez máis” ao Goberno español e á Xunta “que saian da súa posición inmovilista e vaian a esa alternativa de intervención pública, a única solución real para evitar o que aconteceu coa Coruña”, onde Alcoa desfíxose dunha factoría na actualidade intervida xudicialmente por indicios de descapitalización.