Os traballadores do complexo industrial de Alcoa en San Cibrao esperan noticias do Ministerio de Industria en relación coas negociacións que está a levar “persoalmente a ministra”, Reyes Maroto, coa dirección da multinacional para facilitar o proceso de venda da planta de aluminio primario.
“A ministra está a levar a negociación con Alcoa persoalmente”, dixo a Efe o presidente do comité de empresa, José Antonio Zan, quen tamén recoñeceu que a representación dos traballadores non ten máis información sobre esas conversacións. “Descoñecemos como está a negociación”, recoñeceu José Antonio Zan, quen en todo caso confía en que esas xestións do Ministerio de Industria permitan alcanzar “unha solución canto antes” para garantir o mantemento da produción e, consecuentemente, dos postos de traballo na fábrica.
De momento, non foi convocada ningunha reunión para informar os traballadores da marcha desas negociacións e tampouco Alcoa facilitou información ao comité en relación con esas conversacións, cuxo resultado agardan os máis de mil empregados do complexo industrial e os traballadores das auxiliares
