O vicepresidente segundo da Xunta, Francisco Conde, pediu ao Goberno “solucións reais” e que “pase das boas palabras aos feitos” para dar un prezo enerxético que permita que a planta de Alcoa San Cibrao, en Cervo, poida reiniciar as cubas “canto antes”, aínda que inicialmente está programado para 2024.
“Nestes momentos, os traballadores necesitan solucións reais, necesitan feitos e concretar os pasos para reactivar canto antes a produción”, insistiu, en declaracións aos medios.
Neste contexto, o tamén conselleiro de Economía, Empresa e Innovación reclamou ao Goberno que concrete “un espazo de traballo” para poder desenvolver os acordos de compra de enerxía (os chamados PPA) que permitan que Alcoa reinicie as cubas.
“De pouco servirá avanzar no campo industrial se realmente ao principal problema que ten Alcoa, que é o prezo enerxético, non se lle atopa unha solución”, engadiu Conde.
Todo iso suferon cuestións, tal e como lembrou o vicepresidente segundo, que o presidente da Xunta, Alberto Núñez Feijóo, levou á súa reunión este xoves coa vicepresidenta terceira do Goberno e ministra para a Transición Ecolóxica e o Reto Demográfico, Teresa Ribera.
