O comité de empresa da factoría de Alcoa en San Cibrao –Cervo reclamou á multinacional que “axilice” os investimentos comprometidos para a planta no acordo polo que se decidiu parar as 512 cubas da planta durante os próximos dous anos.
Este mércores, o presidente do comité, José Antonio Zan, constatou que a empresa “está a buscar enxeñeiros para algúns investimentos”, pero incidiu en que é preciso “que axilice moito máis eses investimentos”.
“Nestes momentos seguimos esperando acabar con eses procesos de enxeñaría para que os investimentos se empecen a ver. Seguimos, tamén, esperando por saber máis sobre o marco enerxético e esas posibles empresas que se sumarían a Greenalia na subministración de enerxía a longo prazo a partir de 2024″, sinalou.
Zan puntualizou que os traballos na planta “está moi avanzados” na eliminación de dentro das cubas de laalumina “para poder ter un arranque o máis factible posible”.
“Despois pasariamos á eliminación das costras, do baño que hai dentro das cubas e ese será o traballo físico máis duro que imos ter nestes dous anos”, sinalou. A continuación, Zan indicou que os traballadores estána a espera de que “se poña data” á comisión de seguimento dos acordos coa multinacional do aluminio.
Lembra que a anterior reunión foi o 21 de xaneiro e entende que se volverá a convocar sobre as mesmas datas do mes de febreiro. “Unha vez que teñamos a reunión ter coñecemento doutros temas que hai encima da mesa e agardemos que se cumpra ese acordo ao que se chegou e non temos ningunha dúbida que pasa polos investimentos, o marco enerxético e o cumprimento da parte laboral por Alcoa”, concluíu o presidente do comité de empresa.