A frota de Celeiro, no municipio de Viveiro, que permanece amarrada a porto desde o pasado luns, medita terminar co paro a pesar de que se mantén a alza do combustible e a baixada de prezo do peixe. O xefe de frota de Celeiro, Suso Lourido, constatou que son oito barcos os que permanecen no peirao amarrados e á “expectativa” sobre os prezos do peixe e do combustible.

Lourido sinala que “houbo un descanso na subida do gasóleo, a día de hoxe págase a 99 céntimos o litro, que supón un incremento do 36 por cento desde o 1 de marzo”. Confesa que a situación é “complexa porque as empresas van ter que tomar unha determinación, pero imos acabar saíndo ao mar, porque os créditos hai que pagalos e as tripulacións teñen que recibir os seus salarios”. “Aínda que sexa a perdas haberá que saír (ao mar)”, razoa.

Outro aspecto que “non axuda” son os “baixos prezos que se abonan polo peixe”. Pon de exemplo que a pescada se paga a “pouco máis de tres euros o quilo”. “Os prezos seguen á baixa e o combustible á alza”, lamentou. O depósito de Celeiro é o “principal porto de pescada do Gran Sol”.