O presidente do comité de empresa de Alcoa San Cibrao, en Cervo (Lugo), José Antonio Zan, apuntou aos “problemas bastante graves” que afronta a planta de alúmina polo actual custo do gas.
Esta foi, entre outras, unha das cuestións que abordou a comisión de seguimento da situación da factoría da Mariña. “Comunicaron problemas bastante graves e polos cálculos económicos e o custo do gas actual xa sabemos todos como estariamos en 2023”, sinalou Zan. Por iso, o comité pediu unha reunión co Goberno central para que este traslade “que apoios para evitar perdas e salvar esta situación moi preocupante” existirán.
A próxima reunión da comisión de seguimento foi convocada para o 19 de outubro, tamén ás 12,00 horas, e os representantes dos traballadores esperan que Xunta e Goberno “falen destas próximas axudas da UE”.
OBRAS E PPA
En canto aos investimentos, Zan valora que “comunicaron que están moi próximas a chegar á execución”, todas “salvo a do forno, que empezará en xaneiro”. Pola súa banda, o refractario “xa empeza hoxe a tirarse” e “vai durar catro meses” que ocuparán a “o tres quendas da empresa que normalmente facía” estes labores, “co cal cando se empezo en xaneiro xa estará moi avanzado a derriba”.
Mentres, o DBR “segue pendente da aprobación da Xunta” e as PPA (acordo de enerxía renovable) están “totalmente en mans das administracións”. A de Greenalia, segundo Zan, ten visos de ser aprobada na súa “gran maioría” e está en tramitación administrativa. “Se aproba a Xunta (…) xa pasariamos a ter esa PPA e empezaríanse a fabricar os parques eólicos”, dixo.
A outra, “que estaba próxima, por temas de confidencialidade non poden dicir en que momento e condicións están”, nin sequera se é a de Endesa ou a de Capital Energy. “Teremos que esperar”, resolveu.
