-Cal é o tema arredor do que tratará o encontro que Mariña Patrimonio organiza este sábado en Sargadelos?

A conferencia é O castro de Rueta. Resultados das investigacións arqueolóxicas de mínima invasión. O tema xirará arredor dos traballos realizados mediante arqueoloxía non invasiva cando se pasaron os xeorradares e o magnetómetro no castro polos investigadores do CSIC. Todos eses datos tiveron que ser procesados para sacar resultados e conclusións, así pois, basicamente o encontro de mañá será ofrecer eses resultados e conclusións.

-‘Mariña Patrimonio’ especulades con algunha idea en relación ao traballo feito polo CSIC?

Xa temos falado con eles e a súa resposta é que os resultados son moi interesantes e mesmo que habería que valorar facer algunha outra intervención. Tamén nos enviaron a memoria que lle enviaron á Dirección Xeral de Patrimonio mais están por interpretar varios temas nese documento. Con todo, a resposta é positiva en tanto falan da visión de estruturas de cabanas e outras moi parecidas. Aínda así, pouco máis sabemos pois esperamos o encontro de mañá para sabermos con detalle o resultado do traballo feito.

-Que público esperades que asista a esta presentación de resultados?

Pois non sabemos, o certo é que nos arriscamos abondo poñendo estas conferencias pola mañá. Non é o habitual. Si que temos feito palestras semellantes e sempre nos veu moito máis público do que esperabamos, salvo a última que foi en Nadal e apareceu menos persoas das esperadas. Aínda así, temos abondo público nas nosas palestras. Pensamos que con este tema do castro, xente de Cervo e propietarios de Rueta están espectantes de ver que contan os arqueólogos. Isto é moi novidoso e tanto a xente e mesmo nós, descoñecemos todo o relativo ao que se pode ver.

-Os arqueólogos eran tanto do CSIC e mesmo viñeran de Extremadura.

Os que viñeran eran do CSIC de Santiago, o arqueólogo era de Asturias, e quen levaron os xeorradares foron os arqueólogos de Extremadura. O que pasou o xeorradar non tiña pensado vir mais ao final animouse e participará no encontro.

-Esperades que con este tipo de traballos e encontros a xente da comarca se anime máis a informarvos sobre posibles elementos arqueolóxicos?

Na Mariña o estudo do patrimonio histórico e arqueolóxico estivo sempre moi abandonado e esta é unha comarca onde se descoñece moito ese patrimonio. Alí onde se realizaron as primeiras excavacións fixéronas persoas afeccionadas, xente con coñecementos que quixeron saber sobre a súa zona. Grazas a estes afeccionados foi como se abriu camiño. Mais na Mariña nunca houbera un personaxe destes que se adicara a investigar pola súa conta o tema da arqueoloxía. Aquí non se coñecía realmente o patrimonio desta área. Segue habendo mámoas e outros elementos que fomos catalogando. Despois hai persoas que, cando aparece algo na súa parroquia ou sospeitan da existencia de algo, lles gusta dar noticia disto. Hai moitas persoas que nos contacta para darnos a coñecer determinadas construcións e tamén agora hai maior concienciación logo da cantidade de denuncias que presentamos. Pensamos que a postura cara o patrimonio cambiou moito, xa hai moito máis coidado o mesmo que os concellos para faceren rutas, a mesma Deputación tamén organiza rutas e vemos que son aquelas abertas previamente por Mariña Patrimonio. A nós parécenos ben pois pode abrir novas posibilidades.