O incendio forestal que desde o xoves afecta o municipio lugués de Trabada e que arrasou xa 1.200 hectáreas deuse por estabilizado este mediodía, ao redor das 13.15 horas. Os técnicos da Xunta tamén dan por controlados os catro lumes en zonas próximas declarados en Foz.
O último balance ofrecido ás 13.13 horas deste sábado pola Consellería do Medio Rural mantén invariable o estado e a superficie afectada do incendio de Trabada, que ameazou casas, obrigou a cortar estradas (incluída a A-8) e alcanzou ao municipio veciño de Ribadeo.
Así, a Xunta sinala que o lume “evoluciona favorablemente”, o que permitiu desactivar na tarde do venres a ‘situación 2’, nome polo que se coñece o protocolo de actuación en caso de perigo para núcleos habitados pola proximidade das chamas.
A última estimación ofrecida pola Consellería do Medio Rural, que recoñeceu o venres as dificultades para medir con exactitude o perímetro das chamas pola presenza de fume, sitúa a superficia afectada polo lume en 1.200 hectáreas. O conselleiro de Medio Rural, José González, afirmou que o incendio foi provocado.
Desde o seu inicio no mediodía do xoves (a Xunta apunta á intencionalidade como causa principal), traballaron na zona oito técnicos, 65 axentes, 92 brigadas, 61 motobombas, tres pas, cinco unidades técnicas de apoio, un tractor e seis avións e tres helicópteros.
CONTROLADOS EN FOZ
Ademais, os catro lumes próximos que afectan o concello lugués de Foz están controlados desde o mediodía deste sábado, segundo trasladou Medio Rural.
Entre os catro focos suman un total de 230 hectáreas de superficie afectada polas chamas na zona de Santo Acisclo do Valadouro e Santa Cilla do Valadouro, onde operaron para sufocar o lume dous técnicos, 23 axentes, 19 brigadas, 18 motobombas, unha pa e un helicóptero.
