O Concello de Ribadeo agarda que o proxecto de rehabilitación da antiga Casa de Telefónica reciba o visto bo da Dirección Xeral de Patrimonio para concretar o acordo ao que chegara coa empresa Paisajes de Asturias en relación coa Torre dos Moreno.

En xullo pasado, o goberno local anunciara a súa intención de permutar a parte da propiedade municipal do emblemático edificio da Praza de España –o 21,25%– polo inmoble da Praza de Abaixo restaurado. 

O proxecto do executivo local esixía ofrecer á Xunta de Galicia o dereito de tanteo e retracto sobre a propiedade municipal. Segundo explicou o alcalde ribadense, a administración autonómica renunciou a exercitar esa facultade.

“Basicamente confirmaron que non teñen interés ningún”, sinalou Fernando Suárez Barcia, que lembrou a “falta de colaboración” do goberno autonómico na última intervención realizada na Torre dos Moreno en 2012 para evitar o seu desplome, financiada polo concello e Paisajes de Asturias.

O rexedor explicou que o goberno local mantén a folla de ruta para concretar a permuta. “Estamos agardando que Paisajes de Asturias teña o informe favorable de Patrimonio para rehabilitar o outro inmoble. Non podemos avanzar sen ter esa garantía”, argumentou Suárez Barcia.

O proxecto está pendente dunha corrección de erros por parte da firma que, en primeira instancia, non obtivo a autorización da administración autonómica.

Unha vez restaurada e en mans do concello, a antiga Casa da Telefónica acollerá o xulgado de paz, agora ubicado nun edificio “nunha situación estrutural terrible”, admitiu o rexedor que acusou á Xunta de Galicia de aproveitar “resquicios legais” para “desentenderse” das condicións nas que traballa “o seu persoal”.

INICIATIVAS DO PSdG NO PARLMENTO

O PSdG de Ribadeo, que se posicionou a favor da proposta do goberno local de iniciar o procedemento para a permuta con Paisajes de Asturias, lamentou  “que dende o Concello de Ribadeo e dende a Xunta de Galicia non se estea informando á cidadanía sobre o futuro da Torre dos Moreno”.

O grupo socialista explicou que presentara “diferentes iniciativas no Parlamento autonómico para esixir ao goberno galego que aclare en que situación está a petición do Concello de Ribadeo de ceder a parte de propiedade municipal do inmoble.

RENOVACIÓN DAS PLACAS

Trinta rúas e prazas da zona nova de Ribadeo terán nos vindeiros días novas pracas idenficativas.

O concello  informou de que a empresa adxudicataria das actuacións está a traballar na renovación da sinalética, como xa fixera coas do casco antigo.

Os soportes foron deseñados por Sargadelos e, algúns deles, levan textos escritos polo cronista oficial ribadense, Eduardo Gutiérrez.