O Museo do Castro de Viladonga acolleu unha reunión con asociacións dos dez concellos galegos e asturianos que percorre a Vía Rexia do Norte.

Un grupo de traballo formado polos municipios, a pinacoteca, a Deputación de Lugo e varios especialistas aspira a que se recoñeza a ruta como Camiño de Santiago.

Na xuntanza explicouse ás máis de 50 persoas asistentes os traballos realizados ao longo dos máis de tres anos de proxecto, desde febreiro de 2016 até hoxe.

A continuación, a empresa de enxeñería Xelda Eido Rural, encargada de levar a cabo o proxecto de recuperación e posta en valor, expuxo o traballo a realizar nos vindeiros meses deste ano 2019.

Así, estableceuse un calendario de reunións a nivel local, repartidas por concellos, de forma que nesas xuntanzas se poida estudar máis a fondo os mapas cartográficos do itinerario, e ampliar e corroborar a información que se ten xa rexistrada.

A IMPORTANCIA DA MEMORIA ORAL

Estas reunións comezarán o 29 de marzo no concello de Riotorto. Seguirán a de San Tirso de Abres, Meira e Pastoriza, Vegadeo, A Pontenova, Castro de Rei, Castropol, Pol e Lugo.

A intención desta reunión foi establecer contacto coas asociacións vinculadas con este camiño, para servir de filtro e coordinación coa poboación local, chegando desta maneira á veciñanza.

O obxectivo é colaborar co proxecto para incrementar a recollida de información que avale o estudo que se está a facer a nivel bibliográfico, documental, territorial, patrimonial ou etnográfico.

A parte etnográfica e a memoria histórica oral e colectiva “é algo que non aparece reflexado documentalmente na maioría das ocasións, e que é importantísimo á hora de valorar e estudar a información achegada e o territorio no que se traballa”, sinalan desde a organización do proxecto.

A veciñanza é “propietaria dun saber fundamental, ás veces por medio de fotografías antigas, escrituras de fincas onde aparecen lindes que identifican este camiño, ou coñecedores da toponimia e microtoponimia, elementos patrimoniais ou xeográficos, que vinculan directa ou indirectamente a contorna coa traza na que se está a traballar”.

Por este motivo se fixo un chamamento a toda a veciñanza que poida aportar información a participar nas reunións programadas.

HOMENAXE A XOSÉ MANUEL CARBALLO

A xuntanza serviu tamén para lembrar ao cura de Castro de Rei, Xosé Manuel Carballo, que formou parte do grupo de traballo dende o momento da súa formación e que sempre tivo presente e reivindicou a necesidade de vincular á poboación por medio das asociacións veciñais e culturais.