Unha pequena vila de apenas 700 habitantes coñecida en toda España. Taramundi é un dos pobos do occidente de Asturias limítrofes con Galicia que ten por singularidade ser un dos pioneiros do turismo rural e ó mesmo tempo un dos grandes exemplos de recuperación dunha vila tradicional desenvolvida dende o turismo.
Está a apenas uns quilómetros da fronteira de Lugo, nos vales do Turia e do Eo e segue sendo hoxe en día unha das comarcas galego falantes de Asturias. Este pequeno enclave é un verdadeiro exemplo para moitos pobos do norte de España e de Galicia de como conservar a historia e proxectarse no futuro.
TRADICIÓN FERREIRA
É coñecida pola súa artesanía, e en concreto polas navallas de Taramundi, que tamén discorreron por séculos coma unha icona pola xeografía galega. A ferrería, como en moitas comarcas da montaña de León, Galicia e Asturias, ten unha antigüidade excepcional. Hoxe en día conservanse numerosos obradoiros e en singulares conxuntos etnográficos como Teixois, Mazonovo ou Bres. Por iso, ten a honra de ser un dos lugares de Asturias declarado “Zona de Interés Artesanal”, contando co “Museo de la Cuchillería” de Pardiñas e coa singularidade de contar nas súas rúas coa navalla máis grande do mundo.
Este pobo soubo conservar esta riqueza, así como a fermosoura da súa arquitectura tradicional e, por iso, é un dos destinos rurais máis demandados polos turistas durante o verán. Toda a información no portal Historia de Galicia.