A Coordinadora Ecoloxista d’Asturies presentou alegacións ao trámite de consultas do estudo de impacto ambiental da nova fábrica de produción de celulosa blanqueada de ENCE en Navia.
Trátase, segundo explica o colectivo, da nova planta de pasta Dissolving, “de maior valor engadido” que a actual Kraft que se fabrica. O proxecto suporá un incremento da capacidade de produción ata un 54%, así como un aumento da xeneración de electricidade cunha nova térmica de 40 MW que aumenta nun 50% a actual capacidade de producir enerxía que ten agora mesmo o complexo, con dúas térmicas de biomasa funcionando.
A Coordinadora mostra a súa preocupación pola “colonización” de “gran parte” de Asturias polas plantacións de eucaliptos nitens, que substitúen aos globulus actuais. Os ecoloxistas salientan que esta nova espeice “aquí non é legal e está en camiño de declararse como invasora, o que vai xerar un elevado conflito, polo que nos opoñemos ao seu uso nesta nova planta”.
O colectivo argumenta que se está a dar unha contradición, pois mentres “a empresa anuncia que non quere máis superficie de eucalipto en Asturias, o Goberno rexional está permitindo a súa plantación masiva sen ningún control, árbores que van maioritariamente para a papeleira”.
AUMENTO DA MADEIRA CONSUMIDA EN 1,75 TONELADAS
Os cambios na planta suporán un aumento da madeira consumida de 1.745.640 toneladas ao ano, un 40% co consiguiente impacto para o abastecemento.
A Coordinadora sostén que “nada despreciable vai ser o impacto de levar toda esta materia prima e sacala en camións, que é o método utilizado que nos parece de importantes consecuencias para todo o medio e os colindantes”, indica.
Deste xeito, os ecoloxistas propoñen “alternativas” para “paliar o tránisto continuo dos camións e o impacto destes aos colindantes e nas estradas”.
EMISIÓNS CONTAMINANTES E IMPACTO OLFATIVO
No comunicado, a agrupación remarca tamén que nas novas instalacións “haberá novos focos de emisión ao aire significativos que van ter un aumento das emisións contaminantes do complexo. En canto ao impacto olfativo“, a asociacións cre que “pode continuar”.
CONTAMINACIÓN ACÚSTICA
“Vemos necesaria a instalación nas estacións de control da contaminación dun sonómetro que mida en continuo as emisións da zona, para que se poida paliar os ruídos que sofren os veciños, fartos xa denuncialos”, agrega.
CONSUMO DE AUGA E DEPURACIÓN
No relativo ao consumo de auga bruta, a Coordinadora salienta que vai “aumentar ata un 41% coa consiguiente necesidade de mellorar a actual depuración. Seguimos reclamando que as augas residuais do proceso, unha vez depuradas en condicións, se vertan á ría de Navia diluídas, xa que se supón que deberían ter un nivel elevado de calidade. Non é aceptable como se fai agora e preténdese continuar facendo mediante un emisario ao mar escondido“, indica.
O colectivo tamén ve “inaceptable” a pretensión da empresa de valorizar “todos os lodos do tratamento biolóxico da depuradora coa súa carga contaminante nas caldeiras. Estamos falando dun total de 3.700 toneladas ao ano, que se estiman de lodos do proceso. Parécenos perigoso utilizar gran parte dos residuos do proceso como combustible nas plantas de biomasa, pola carga contaminante que teñen”, conclúe a Coordinadora.
ENCE: “RESPECTAREMOS O MEDIO AMBIENTE”
A papeleira emitiu un comunicado no que asegurou que as actuacións proxectadas “serán plenamente respectuosas co medio ambiente” e que o aproveitamento da especie nitens mencionado pola Coordinadora “virá de Galicia, en concreto de Lugo“, onde si que se considera esta especie como forestal.
Ence afirma que “non avoga” por un cambio da norma sobre esta especie en Asturias e sostén que a pasta Dissolving “serve para elaborar viscosa destinada á industria téxtil, tratándose dun produto procedente de materias primas renovables que permitirá reemprazar outro tipo de fibras sintéticas provintes de hidrocarburos“.
A empresa tamén se compromete a diminuír “o impacto sonoro e oloroso” denunciado polo grupo ecoloxista.
