As vellas escrituras de fincas que se atopan nos cantís da costa da Mariña Lucense din que lindan ao norte coas illas Atlánticas, Inglaterra e Irlanda, mar por medio. Por iso, a seguinte viaxe de Rutas de Historia, o proxecto de turismo cultural e patrimonial impulsado por Historia de Galicia, será a esa costa salvaxe que discorre por terras ribadenses, preto das que milleiros de turistas visitan cada ano, pero descoñecidas por todos eles.
O Castro das Grobas, o de Fornelos, o de Meirengos e o dos Castros, testemuñas da importancia da zona hai 2.000 anos, protagonizarán o roteiro do vindeiro sábado, 28 de setembro —para o que aínda quedan unhas poucas prazas—. “O mar foi unha auténtica autopista que nos permitiu na antigüidade comunicarnos coas culturas atlánticas e tamén mediterráneas”, expón Manuel Miranda, presidente de Mariña Patrimonio.
OLLOS DE MAR, CETÁREAS, UN FORNO ROMANO,
Ollos de mar, cetáreas ou un forno romano son algúns dos atractivos do percorrido, do que Miranda fala nesta entrevista.
