En Marea Ribadeo presentou un escrito no rexistro para solicitarlle ao goberno local que publique o convenio entre o Concello e a empresa Paisajes de Asturias para a cesión da parte municipal da Torre dos Moreno, dun 21% a esta firma.

Goberno local e empresa formalizaron o acordo na primeira quincena deste mes de setembro, un pacto polo que a empresa asturiana se compromete, segundo anunciou o Concello, a rehabilitar “nun prazo máximo de dous anos” a antiga Casa da Telefónica, que o executivo municipal recibiu en troque e que quere utilizar como sé do xulgado de paz.

En Marea Ribadeo lembra que “os trámites para a cesión da parte propiedade do Concello na Torre dos Moreno seguen adiante” sen que o documento, aseguran, “figure nas actas do pleno nin da Xunta de Goberno“.

APROBADO NUNHA XUNTA “NON PÚBLICA”

Deste xeito, e dado que considera que se trata dun “asunto de interese xeral para a veciñanza”, o partido instrumental quere “coñecer exactamente os termos do convenio e podelos transmitir á opinión pública”.

En Marea Ribadeo remarca que o acordo da cesión do monumento indiano foi tomado o 8 de maio de 2019 “en sesión non pública, en contra do que di a sentenza do Tribunal Constitucional do 26 de setembro de 2013″. Dese xeito, a formación reclama saber “o prezo certo” da parte municipal e tamén “unha copia do texto do convenio”.