A Coordinadora Ecoloxista d’Asturies anunciou que presentou de novo alegacións con motivo do novo trámite de alcance do estudo de impacto ambiental do proxecto da mina de ouro de Salave, no concello de Tapia de Casariego.
O colectivo lembra que o Goberno de Asturias “xa facilitou en varias ocasións o visto bo a este perigoso proxecto mineiro, que se paralizou grazas aos informes contrarios da Confederación Hidrográfica polo seu impacto nas augas”.
“Agora o proxecto si cabe vai ter moito máis impacto ao substituír as montañas dos lodos e estériles do proceso, por vertelos por un emisario ao mar, ampliando as zonas afectadas con estes contaminantes, que acabarán en toda a cadea trófica mariña”, expón a agrupación ecoloxista, que coincide na análise coa Plataforma Oro No.
Deste xeito, a Coordinadora reclama “un estudo detallado e exhaustivo do impacto sobre as augas continentais, subterráneas e os ecosistemas asociados a estas”, que documente “calquera modificación hidromorfolóxica” que “poida supoñer un deterioro do seu estado potencial”.
EFECTO SOBRE AS LAGOAS DE SILVA
Os ecoloxistas tamén piden un informe das afeccións “que se producirán ás lagoas de Silva, durante a explotación e logo desta, con detalles dos riscos de perda de caudal dos seus actuais abastecementos, así como a valoración da posibilidade de salinización”.
IMPACTO SOBRE A FAUNA E A FLORA
A “caracterización das augas residuais que se xerarán nos diferentes procesos e as diferentes alternativas de tratamento”, ademais “dun estudo detallado sobre o impacto na fauna e na flora, realizando un traballo de campo amplo sobre a afección ás especies singulares e endémicas da zona”, son outras das preocupacións da Coordinadora.
AFECTACIÓNS Á PAISAXE E ÁS POBOACIÓNS LINDEIRAS
Os ecoloxistas cren que se debe valorar tamén o impacto sobre a paisaxe, “debendo ser estudado considerando a conca visual do conxunto de instalacións, explotación e vertedeiros, a presenza de varias poboacións á beira do xacemento e a zona de tratamento”.
Tamén reclaman un informe do impacto sobre “os hábitats afectados, ao tratarse dunha zona colindante con Peñaronda-Barayo, durante a explotación e durante a clausura”.
En vista de que o proxecto propón o tratamento final do material a un terceiro, “é necesario concretar onde está situado este terceiro para valorar o impacto dese traslado continuo de mercancías e o impacto destes movementos”, considera a asociación.
CONSECUENCIAS NA PESCA OU NA GANDERÍA
En vista de que a explotación ten efectos décadas despois do seu peche polos tóxicos que se xeran, “é necesario concretar que medidas técnicas se van tomar para garantir a estabilidade e falta de contaminación dos restos da explotación, durante o traballo e finalizada a actividade”, asegura a agrupación.
Finalmente, a Coordinadora reclama “que se estude a acumulación de impactos ou os efectos sinérxicos producidos como consecuencia deste proxecto mineiro e como vai prexudicar outras actividades da comarca (pesca, gandería ou hostalería)”.
