O Concello de Cervo elaborou un plan especial de protección do castro da Atalaia. O borrador estará a disposición pública na web da Consellería de Medio Ambiente ata o 24 de setembro, para ser sometido a aprobación no pleno, probablemente no mes de outubro.
O proxecto será o primeiro paso para a posta en valor do xacemento, inventariado no 2007 e ubicado en San Cibrao. De ser aprobado pola corporación, o plan servirá como soporte legal para que o goberno local poda adquirir ou expropiar parcelas de titularidade privada nas que se atopa unha parte do castro que se quere conservar.
de ser aprobado pola corporación, o documento servirá como soporte legal para adquisición ou expropiación de terreos
Así, a elaboración do plan responde á intención do Concello de “buscar unha fórmula para que os terreos que se inclúen nese plan e non son públicos pasen a selo”, segundo expón o alcalde de Cervo, o popular Alfonso Villares, que engade que “xa puxemos toda a maquinaria municipal en marcha para este propósito”.
As parcelas que o goberno local aspira a expropiar ou adquirir son unha na que se ubica un esquelete de formigón, outra na que se construíu unha vivenda unifamiliar deshabitada e dúas sen edificar. “A idea é eliminar os edificios, pois non nos serven”, explica o rexedor.
o goberno local quere derruír os edificios inutilizados na atalaia, en parcelas de titularidade privada
ORZAMENTO
Segundo o plan económico que inclúe o documento, o custo da expropiación dos terreos e mailo seu acondicionamento –demolicións e intervención arqueolóxica-, ascendería a 320.417 euros.
NORMATIVA
O plan de protección delimita a parte do castro que se quere conservar, que abrangue uns 20.000 metros cadrados. Tamén regula a execución das actuacións de recuperación, rehabilitación ou mellora da superficie a preservar e fixa as normas xerais de urbanización e infraestruturas neste ámbito protexido.
