Historia, micoloxía e a pesca baleeira protagonizarán os seguintes percorridos de ‘A Mariña en ruta’

Ribadeo, O Valadouro e San Cibrao serán os lugares que visitarán os participantes nos roteiros, os días 7, 15 e 21 de novembro, coas prazas reducidas a catro pola Covid-19

Atalaia de San Cibrao. TURISMO DE GALICIA

Continúan as rutas da Mariña en Ruta programadas para este outono, unha iniciativa que a Mancomunidade de Concellos da Mariña Lucense puxo en marcha co apoio da Axencia de Turismo de Galicia e da Deputación de Lugo e que coordina a empresa de ecoturismo Maremasma. Este mes de novembro o ente propón descubrir centros históricos, portos baleeiros e bosques autóctonos cheos de cogomelos, coma sempre, da man de guías e axentes locais.

Desde a Mancomunidade explican que “debido á actual situación e ao nivel 2 de restricións no que se atopa Galicia para a organización deste tipo de actividades as prazas dispoñibles tiveron que verse reducidas a catro persoas mais o guía. Ademais do uso obrigatorio de máscara e da pertinente distancia de seguridade”, remarcan.

O COMERCIO, MOTOR HISTÓRICO DE RIBADEO

A primeira das rutas de novembro terá lugar o día 7 a partires das 10.30 da maña con saída da praza de España, de Ribadeo. Será a denominada O Ribadeo dos comerciantes, que será guiada por Sofía López. Neste paseo percorrerase o centro histórico da vila.

“O antigo recinto amurallado da vila desenvólvese desde o século XII ao XIX grazas ao intenso comercio por vía marítima. Nas súas fermosas rúas, pazos brasonados e grandes caseróns de comerciantes mestúranse con pintorescas vivendas de pescadores e artesáns, nun conxunto urbano cuxa historia non te deixará indiferente. Na localidade chegou a haber representantes consulares de diversos países de Europa e América“, remarcan desde a comunidade.

SAN CIBRAO, PORTO BALEEIRO

A segunda ruta será a chamada San Cibrao, porto baleeiro, dende a Idade Media ata a actualidade. Será o 15 de novembro, estará guiada por Anxo Cao e partirá ás 10.30 horas de Asteleiros Fra Rico.

“San Cibrao é un dos primeiros portos baleeiros do Cantábrico e contarase a súa evolución histórica, dende as baleas que se cazaban na Idade Media ata as que se capturaban nos anos 70. Explicaranse en profundidade as especies de cetáceos que se poden ver en Galicia, e o seu estado de conservación na actualidade. Aproveitarase de igual maneira para falar sobre a relación histórica deste pobo co mar”, concreta a Mancomunidade.

A FRAGA DAS LEIRAS E A SÚA VARIEDADE VEXETAL

E a terceira ruta discorrerá pola Fraga das Leiras. Chámase Cogomelos do noso monte e terá lugar o 21 de novembro a partir das 10.00 da mañá con saída desde Ferreira do Valadouro. Este roteiro micolóxico será guiado por Pedro Rolle.

“A Fraga das Lerias está situada entre O Cadramón e Frexulfe. Esta fraga posúe unha cantidade de especies vexetais autóctonas incomparable a calquera das da súa contorna. No seu percorrido pasarase por bosques autóctonos en busca de fungos. Os asistentes aprenderán a identificar os diferentes cogomelos que se poden atopar na comarca, descubrindo o seu valor biolóxico e gastronómico. Ademais durante todo o percorrido gozarán dunha paraxe natural de gran biodiversidade e dunhas vistas outonais preciosas das montañas que rodean o val”, expoñen os organizadores.

INSCRICIÓN

O presidente da Mancomunidade, Fran Cajoto, recorda que “a seguridade sanitaria é o primeiro, por iso se tomarán todas as precaucións oportunas e está previsto un posible retraso das actividades se as autoridades sanitarias así o dispuxesen. En todo caso, seguimos a traballar e cremos moi positivo neste momento continuar coa posta en valor do noso patrimonio cultural, histórico e natural, cunhas rutas que están a ter unha acollida inmellorable”, remarca.

Toda a información sobre as rutas, a súa duración e características, está na páxina web do proxecto. Para participar é necesaria inscrición previa na web. Aquelas persoas que desexen máis datos poden contactar con enruta@amarinalucense.gal ou co teléfono 772 16 41 06.

RESPOSTAR

Please enter your comment!
Please enter your name here