A nova directora de Augas de Galicia, Teresa Gutiérrez, mantivo unha xuntanza este martes coa alcaldesa de Viveiro, a socialista María Loureiro, na que informou á rexedora de que a entidade hidráulica iniciou os trámites a fin de retirar “a parte non soterrada do actual emisario submarino” para a execución dun novo.
Segundo explicou Gutiérrez, esta primeira obra é necesaria para “desbloquear a tramitación dos permisos pendentes da Demarcación de Costas do Estado”.
“Con esta intervención”, sinala Gutiérrez, “facilitaremos o acordo con Costas do Estado, que require a retirada do emisario existente como condición indispensable para permitir a execución dun novo”.
Ademais da execución dun novo emisario submarino, o proxecto de Augas de Galicia, que “ten reservado un investimento de tres millóns”, inclúe a mellora da rede e conexión á depuradora do núcleo de Celeiro.
Tamén se acometerán intervencións na propia EDAR e un novo depósito, que permitirá xestionar mellor as augas pluviais, evitando “alivios contaminantes á ría”.
Augas de Galicia espera, resolto o escollo con Costas, licitar as obras en 2019. Loureiro sinala que a dirixente de Augas de Galicia prevé completar a licitación do proxecto “nun prazo de seis meses”.
VELLA DEMANDA
A alcaldesa viveirense entende que a reunión, solicitada polo Concello tras anos a demandar “información e prazos concretos de execución” do proxecto, que conta con fondos públicos sen executar desde 2016, trouxo “boas novas”.
PXOM
No tocante ao Plan Xeral de Ordenación Municipal (PXOM), a xuntanza tamén deixou novidades.
A alcaldesa espera recibir “nunha semana” o informe preceptivo que agardaba de Augas de Galicia, e que condicionaba “poder responder ás alegacións dos veciños ou levar o documento ao pleno”.
O ente hidráulico transmitiulle á responsable municipal que existen “unha serie de incidencias que deben subsanarse“, que “serán requeridas nos próximos días”.
