Entre estes proxectos está o de facer un parque subacuático na ría “que poida ser gozado por submarinistas”. Unha idea que se podería sumar ao Camiño do Mar subacuático que tamén impulsa a Xunta como un traxecto diferente dos camiños tradicionais a Santiago dentro do Programa do Xacobeo.
“En calquera sitio no que teñamos patrimonio subacuático temos que gozar del porque representan parte das nosas orixes“, asegura o arqueólogo especializado en patrimonio submariño David Fernández Abella que salienta a riqueza histórica que ocultan as augas da ría de Ribadeo.
O equipo Argos ten localizado xa restos arqueolóxicos de todo tipo; cerámica, madeira, vidros. “Serven de rexistro históŕico do que foi a actividade da ría”, apunta David Fernandez destacando a importancia que nese comercio tiña Ribadeo, como “porto máis importante”, e logo outros como Vegadeo ou Castropol.
PEZAS DE MOITAS ÉPOCAS
De feito, nas augas da ría se teñen atopado obxectos de todas as épocas, o máis antigo, unha ánfora grega, pero tamén hai pezas de distintas épocas, principalmente, a partir do século XVI. Ademais do famoso galegón de Ribadeo, tamén se atoparon restos doutros pecios, un deles documentado nas últimas semanas. Tamén nos últimos días deron conta da aparición de novos canóns que estaban sen documentar e que son doutro pecio. “Son pezas dun puzle histórico que hai que documentar”, apunta o arqueólogo nunha entrevista na Cadena Cope.
Argos Arqueología ten arqueólogos e conservadores, que son os que avalian a conservación dos obxectos “in situ”, é dicir, baixo as augas. En xeral, os obxectos cerámicos están ben conservados, pero outros teñen máis problemas, principalmente, a madeira. Tamén as correntes e dragados modifican as condicións e o estado de conservación destas pezas.
“Por iso facemos monitorización dos restos para que non se movan do seu contexto arqueolóxico e para que se poidan valorar no seu contexto orixinal que é baixo auga”, indicou.
XUNTANZA CO CONSELLEIRO
