O alumnado de 6º de Primaria do CEIP Virxe do Carme de Burela aprendeu este mércores como tentar erradicar a vespa velutina, unha especie invasora que nos últimos anos estase convertendo nun grave problema en toda a Mariña.

A Delegación de Medio Ambiente do Concello de Burela, que dirixe Toñi Eijo, a través das monitoras de Gaia e en colaboración con José María Vázquez, xerente de Serpa, realizou co estudantado un obradoiro de elaboración de trampas para a velutina.

Eijo explicou que “o obxectivo foi que os rapaces comprenderan o dano que fai unha especia invasora como a velutina e o importante que é poder controlala. Para iso fixemos un coloquio taller de como facer trampas caseiras o máis selectivas posibles para non danar outras especies, onde colocalas, en que época, etcétera”.