A Plataforma en Defensa da Sanidade Pública da Mariña fletará autobuses para acudir á manifestación en defensa dos servizos sanitarios o vindeiro 10 de febreiro en Santiago de Compostela.
A mobilización sairá da Alameda ás 12.00 horas e tras percorrer diversas rúas de Compostela, rematará na Praza da Quintana. SOS Galicia, colectivo que aglutina a todas as plataformas pola sanidade pública da comunidade, convoca a protesta.
Desde a plataforma sanitaria animan á veciñanza da Mariña Lucense a “acudir de forma multitudinaria a esta convocatoria”.
Segundo a plataforma, SOS Galicia esixirá á Xunta de Galicia “a eliminación dos recortes, rematar coa situación marxinal da Atención Primaria, a recuperación das áreas sanitarias roubadas, a dotación axeitada dos PAC e urxencias hospitalarias, e a recuperación de todos os servizos perdidos”.
O colectivo insiste en que “para esta comarca é vital a recuperación da nosa área sanitaria, espoliada polo Goberno autonómico do PP de forma despótica ao non querer escoitar a profesionais, axentes sociais, veciñas e veciños nen aos grupos da oposición“, sinala Víctor Vila, voceiro do colectivo.
RESERVAS
Os interesados en reservar unha praza poden facelo nos teléfonos 667.052.058, 982.58.18.61, 982.14.06.54 (de 10.00 a 14.00 horas) e 982.56.10.01. O último día para reservar plaza será o mércores 6 de febreiro, ás 14.00 horas.
