Días atrás, o Concello viveirense presentaba o primeiro festival da diversidade sexual da Mariña Lucense, o Viveiro Con Orgullo, que comezou este domingo coa inauguración dunha exposición e unha charla. O Agrocuir da Ulloa é un referente deste tipo de eventos, que tentan normalizar as distintas identidades sexuais na xeografía galega, neste caso na rural.

“O campo era considerado unha especie de armario para o colectivo LGTBIQ. Pero xa non é así. O Agrocuir trátase de reforzar o sentido comunitario e humano ante o que nos impón o sistema patriarcal imperante“, explica Braulio Vilariño, un dos organizadores do evento.

RACHANDO TABÚS

“Onte mesmo, unha señora achegouse a falar cun rapaz do colectivo”, relata Vilariño, “díxolle que o seu fillo de 16 anos lle acababa de contar que é gai. Veu falar con nós para pedirnos que o apoiaramos, que falaramos con el, co pai… Iso foi unha marabilla!”, conclúe. Silvia López recolleu varios testemuños para realizar unha crónica do Agrocuir que podes ler no LugoXornal.