O persoal do Consorcio Galego de Servizos de Igualdade e Benestar (CGSIB) nas escolas infantís da Mariña, ente pertencente á Xunta de Galicia, iniciou a pasada semana, cunha folga de 24 horas, actos reivindicativos que en diante continuarán cada xoves, de 8.00 a 11.00 horas e de forma indefinida, a fin de paralizar a Oferta Pública de Emprego (OPE) convocada polo Goberno autonómico.
As Escolas Infantís da Mariña (E.I de Burela, E.I Burela Os Castros, E.I de Foz, E.I O Valadouro, E.I Alfoz, E.I Mondoñedo) secundaron esta folga indefinida o día 18 cun alto porcentaxe de participación, e cun amplo apoio por parte das familias.
A folga vén provocada “pola situación contractual de Fraude de Lei ( según dicta a Directiva Europea 1999/70/CE) na que se atopan tódolos traballadores dende hai moitos anos, e que a Administración autonómica pretende arranxar cunha oferta de emprego público de concorrencia libre, na que os traballadores do CGSIB se atopan nunha clara desvantaxe e se senten víctimas dunha situación que non provocaron”, expoñen os convocantes.
“Con esta folga indefinida, os centros pertencentes ao CGSIB pretenden paralizar a OPE, e que as negociacións do proceso vaian enfocadas en poñer en valor o tempo traballado e desempeñado por estes traballadores, en moitos casos máis de dez anos, nuns servizos tan básicos e necesarios como son os que se desenvolven nestes centros de educación infantil”.
