A Plataforma na Defensa da Sanidade Pública da Mariña denuncia o caso dun paciente que agarda desde marzo por un estudo urodinámico.

O colectivo sinala que o doente padeceu un accidente no 2014, a raíz do cal sofreu unha imposibilidade parcial para ouriñar, que lle obriga constantemente a ir ao lavabo, pois non pode baleirar a vexiga.

Dada esta dificultade e as molestias que provoca, o servizo de uroloxía seguiu ao doente desde 2016 e no pasado mes de marzo solicitóuselle un estudo, a realizar como moi tarde en tres meses.

RECLAMACIÓN

Logo de que se esgotara o prazo sen novidades, o paciente realizou unha reclamación o pasado 4 de setembro, con número de entrada 3144.

RESPOSTA

Segundo denuncia a plataforma, o doente recibiu unha carta da Xerencia da Xestión Integrada, con saída do 2 de outubro e número 28095, no que se lle informou “que ten que seguir agardando indefinidamente”.

“INCUMPREN A LEI”

O colectivo resalta que ten constancia de “numerosos casos semellantes” e afirma que o Sergas “volve a incumprir a lei de garantías sanitarias”.