A Deputación de Lugo achega 5.000 euros para a reforma da sede da asociación veciñal de San Román do Val, situada no Vicedo. O presidente da Deputación de Lugo, José Tomé Roca, asinou co presidente da Asociación de Veciños de San Román do Val do Vicedo, Rubén Rábade, dous convenios de colaboración para ampliar a capacidade do local social co que conta o colectivo, así como o seu equipamento e as actividades que organiza.
En concreto, a contribución da Deputación permitirá á asociación veciñal adquirir material para a realización de diferentes actividades no exterior do local social, ampliando o aforamento do mesmo mediante a compra dunha carpa e mobiliario exterior, como bancos e mesas.
Desde a entidade, aseguran que estas melloras posibilitarán que a parroquia conte con diversas actividades culturais, como representacións teatrais ou a proxección de películas. Tamén se adquirirá un xerador de electricidade e dous computadores que servirán tanto para a formación dos veciños, como para reducir a fenda dixital en persoas maiores.
Ademais, estes acordos inclúen dous talleres de artesanía: un curso monográfico de coiro e outro de resina polimérica. Estas formacións realizaranse ao longo dun fin de semana entre os meses de setembro e decembro.
