O municipio de Cervo contará cunha pista experimental de aterraxe e despegue de drones “no mes de abril“, segundo expuxo o goberno local. 

As obras, que contarán cun investimento superior aos 40.000 euros, comezaron no polígono de Cuíña e rematarán o vindeiro mes. 

O alcalde cervense, o popular Alfonso Villares, visitou o lugar onde se están a desenvolver as actuacións con técnicos municipais e de profesionais da industria do aeromodelismo.

O rexedor asegurou que “a nova infraestrutura, froito dun contacto constante que vimos mantendo con empresas e técnicos do sector, permitirá situar a Cervo á cabeza en Galicia deste tipo de voos non tripulados, xa que é a primeira pista destas características a carón do mar, que permitirá nun futuro próximo facer probas e utilizar drones para transporte”.

Villares precisou que o Concello “cre e aposta por este innovador proxecto desde o primeiro momento porque ve nel unha gran oportunidade de futuro para o noso municipio”.