Varias formacións locais do Bloque Nacionalista Galego (BNG) na Mariña Lucense -as de Xove, Cervo, Burela ou Barreiros– denunciaron este mércores o bloqueo das súas contas en Facebook, o que entenden como “un ataque premeditado” contra o partido frontista en plena campaña das eleccións municipais. Os nacionalistas xovenses atribúen a “afíns” do Partido Popular (PP) “denuncias falsas” que motivaron a suspensión da súa páxina.
O BNG de Xove lamenta as “prácticas antidemocráticas” que se “suceden”, afirma, por parte dos “populares xovenses”. Os nacionalistas aseguran que nas pasadas eleccións xerais os carteis da formación frontista apareceron rotos en dúas ocasións, e sosteñen que a súa páxina de Facebook foi cancelada por “contido inadecuado, como se estiveramos a publicar pornografía” logo de “denuncias falsas presentadas por persoas afíns ao PP”.
Os frontistas censuran tamén que o PP local “estea a repartir polos domicilios do municipio” un abridor de cervexa coa frase “Que non te bloqueen”, o que consideran unha “clara referencia ao seu rival político”. Así, cren que se trata dun “comportamento maleducado que desprestixia a institución que representa a toda a veciñanza”.
TRÁMITES PARA RECUPERAR O ACCESO
O BNG de Cervo anunciou tamén este martes o bloqueo da súa conta. “Os avisos que Facebook recibiu por parte de particulares polo noso suposto uso fraudulento da rede forman parte dun ataque deliberado para silenciarnos e facernos dano”, explicou o candidato nacionalista, Diego Fernández.
Fernández subliñou que o Bloque cervense “sempre respecta as normas que marca” a rede social e avanzou que xa se iniciaron trámites para recuperar a conta aínda que, matiza, “no caso de que Facebook acepte as alegacións do BNG de Cervo, tardaríanse 15 horas en recuperar o acceso á páxina”.
