O alcalde de Xove, o popular Demetrio Salgueiro, e veciños de San Isidoro de Monte mantiveron unha xuntanza no salón de plenos do consistorio para abordar “o profundo malestar” polo estado da estrada que vai dende a capital municipal á localidade, “vital para a parroquia” e que presenta un estado “lamentable“.

Segundo critican desde o goberno local, “a cantidade de baches, pequenos e grandes, é incontable, con pérdidas asfálticas en prácticamente todo o percorrido. A estrada, de titularidade da Deputación Provincial de Lugo, é nestes intres un auténtico perigo, tanto para viandantes como para a circulación de vehículos”.

Salgueiro entregou á veciñanza unha copia do acordo asinado entre o Concello de Xove e a Deputación de Lugo segundo o cal a estrada debería estar asfaltada con aglomerado en quente neste 2019, “un acordo que se está a incumprir”, lamenta.