Alcoa rexistrou perdas de 1.125 millóns de dólares (1.008 millóns de euros) en 2019, en contraste co beneficio neto atribuíble de 250 millóns de dólares (224 millóns de euros) do ano anterior, segundo informou a través dun comunicado de prensa a compañía, que confía nun repunte de entre o 1,4% e o 2,4% da demanda de aluminio en 2020.
A multinacional radicada en Pittsburgh precisou que as súas contas de 2019 reflicten un impacto negativo de 1.031 millóns de dólares (924 millóns de euros) por custos de reestruturación, sen os que as súas perdas serían de 184 millóns de dólares (165 millóns de euros), fronte a un beneficio de 698 millóns de dólares (625 millóns de euros) en 2018.
Os ingresos de Alcoa no último exercicio alcanzaron os 10.433 millóns de dólares (9.351 millóns de euros), o que supón un retroceso do 22% en comparación con 2018 como consecuencia dos menores prezos do aluminio.
No cuarto trimestre do pasado exercicio, Alcoa contabilizou perdas de 303 millóns de dólares (271 millóns de euros), fronte ao beneficio neto atribuíble de 51 millóns do mesmo periodo de 2018, mentres que a súa cifra de negocio retrocedeu un 27% no ano, ata 2.436 millóns de dólares (2.183 millóns de euros).
“En 2019, actuamos para reforzar Alcoa, completando o desinvestimento de activos non competitivos, actualizando os acordos laborais en tres países, implementando un novo modelo operativo e avanzando no proceso de avaliación de activos que anunciamos no anterior trimestre”, declarou o presidente e conselleiro delegado de Alcoa, Roy Harvey.
ANUNCIARA UN PLAN DE AXUSTE PARA CINCO ANOS
O pasado mes de outubro, Alcoa anunciou que levará a cabo unha revisión dos seus activos co fin de reducir os seus custos e lograr unha rentabilidade sostible, incluíndo a potencial venda de activos non estratéxicos nun prazo de 12 a 18 meses, para obter liquidez por importe de entre 500 e 1.000 millóns de dólares (448 e 896 millóns de euros), así como unha avaliación das súas actuais capacidades de produción durante un período de cinco anos para identificar potenciais vendas ou desinvestimentos, incluíndo o posible peche de plantas.
A PLANTA DE ALUMINIO DE SAN CIBRAO, EN CUESTIÓN
Neste contexto, a multinacional puxo en cuestión a planta de aluminio de San Cibrao, na que parou 32 cubas e que ve “inviable” co actual prezo da enerxía eléctrica.
De cara ao 2020, Alcoa proxecta un incremento da demanda global de aluminio de entre o 1,4% ao 2,4%, fronte a unha evolución estimada en 2019 de entre o -0,4% e o 0,2%.
