A Xunta de Galicia manterá as restriccións -o peche da hostalería e o confinamento perimetral, entre outras- nos 60 municipios pechados desde a pasada fin de semana, entre eles Burela e Viveiro, e tamén o toque de queda entre as 23.00 e as 6.00 horas, segundo confirmou o presidente do Goberno autonómico, Alberto Núñez Feijóo, nunha rolda de prensa celebrada este luns.
O martes reúnese o comité clínico da Xunta. Preguntado ao respecto, o conselleiro de Sanidade, Julio García Comesaña, asegurou que “o que si podo adiantar é que mañá non haberá en xeral ningún tipo de relaxación de medidas. É moi pouco tempo para ver un efecto positivo ou negativo”, clarificou.
Así o anunciou nunha xornada tráxica, na que Consellería de Sanidade informou do falecemento de 21 persoas diagnosticadas de Covid-19 nas últimas horas, oito delas usuarias de residencias. Na provincia produciuse unha única morte, o dun residente de 60 anos da vivenda comunitaria da Fonsagrada. Deste xeito, Galicia supera o milleiro de mortes desde o inicio da pandemia e alcanza un total de 1.009.
