Os Concellos da Mariña adhírense un ano máis con distintas actividades á campaña ‘En negro contra as violencias’, a fin de dar visibilidade á loita contra o machismo e combater esta lacra.
En ‘Negro Contra As Violencias’ é unha acción colectiva de sensibilización social contra as violencias machistas que xorde en 2015 en Santiago de Compostela co impulso da administración local, crecendo e involucrando ano tras ano a un maior número de Concellos, institucións e sectores, chegando a expandirse de forma viral mesmo fóra de Galicia. Aínda que está latente durante todo o ano, é sobre todo no mes de novembro e, concretamente, no 25 N –Día Internacional da Eliminación da Violencia contra as mulleres-, cando a acción desprega a súa actividade dunha forma máis intensa.
A alcaldesa de Viveiro, María Loureiro, e a concelleira de Cultura e Muller, Lara Fernández, presentaron o pasado martes en rolda de prensa as actividades, entre as que destaca a concentración silenciosa ‘En Negro’ do próximo 25 de novembro ás 12.00 horas na praza Maior, onde se lerá un manifesto reivindicativo.
“Este ano máis que nunca queremos sumarnos a esta campaña, xa que a violencia de xénero segue aí e incluso producíronse máis situacións e casos preocupantes polo confinamento derivado da pandemia”, asegura a alcaldesa de Viveiro.
A BIBLIOTECA DE VIVEIRO, POLA IGUALDADE
Como novidade, este venres o concello entrará tamén a formar parte da iniciativa a nivel nacional ‘Bibliotecas en Igualdade’, que “pretende recuperar e visibilizar o coñecemento de autoría femenina, saldando unha débeda coas mulleres creadoras da historia”, expuxo Fernández.
O Concello inaugurou hoxe tamén na biblioteca un vinilo cunha creación do artista local e xa internacional David Catá. “É unha obra que leva por slogan ‘De igual a igual’ e que responde a unha nova iniciativa máis ampla, que se chamará ‘Viveiro de Igual a igual’, para traballar en prol de alcanzar a igualdade en todos os aspectos do día a día dos nosos veciños e veciñas; esta acción comeza con converter a nosa biblioteca nun espazo divulgativo igualitario”, explica Fernández.
A obra, financiada polos fondos do pacto de estado, xa se pode gozar na terceira planta da biblioteca pública municipal. A descrición do autor é a seguinte: “Metades. O amor é lealdade, respecto e compromiso, factores que deben ir da man. Esta fotografía, que representa estas características, fainos vernos de igual a igual, fragmentos que forman un todo no que as diferenzas non existen e o un non existe sen o outro. Dúas mans unidas, cosidas a unha á outra para sempre e que representan o símbolo do amor, a unión, a forza e a igualdade”.
Finalmente, o día 27 o Concello de Viveiro acollerá unha nova reunión da Mesa Local de Coordinación Interinstitucional contra a Violencia de Xénero, constituída en outubro de 2018 coa representación dos axentes sociais que traballan en Viveiro neste eido.
PREDOMINIO DAS ACTIVIDADES NON PRESENCIAIS
A dificultade de reunirse nos tempos da Covid-19 fai que na campaña, que se espallará por toda Galicia, cobren importancia actividades non presenciais, a través das redes sociais. Na web ennegrocontraasviolencias.gal pódese descargar todo o material. Os cancelos serán #EnNegroContraAsViolencias, #EnNegro2020, #GaliciaEnNegro, #QuerémonosVivas e #NonEstásSoa. Desde o goberno local viveirense animan a todos os sectores a participar.
O Concello de Burela tamén se sumará a esta iniciativa, convidando a tinguir de negro as casas e as rúas. O goberno local únese por cuarto ano á campaña “co obxectivo de visibilizar que as violencias contra as mulleres non cesan e animan á participación activa dos vecinos e veciñas, tinguindo de negro as súas vivendas, balcóns, ou locais”. O mesmo convite fan desde o goberno local de Ribadeo.
PROPOSTAS GLOBAIS
Algunhas das propostas globais que xa están en marcha, en diferentes lugares, son: distribución de máscaras (co deseño que xa se pode descargar na web), pezas audiovisuais, accións con tecedoras, así como a creación de ferramentas colaborativas para recoller as voces das mulleres, como será o lenzo a modo de pancarta virtual que se pendurará na web, un proxecto procesual –ideado polo colectivo de Gráficas en Negro– que aposta pola aprendizaxe colectiva.
