O comité de empresa de Alcoa San Cibrao anunciou a través dun comunicado de prensa que chegou a un acordo coa multinacional para iniciar un proceso de venda da planta de aluminio. O pacto entre os obreiros e a dirección da compañía será sometido a referendo entre o persoal.

Segundo as cláusulas do acordo, os sindicatos suspenderán ata o 30 de abril a folga indefinida que manteñen desde o pasado mes de outubro, ademais de renunciar a incluír no mesmo a factoría de alúmina, petición formulada nos últimos días.

A compañía, pola súa banda, comprométese a negociar “de boa fe” coa Sociedade Estatal de Participacións Industriais (SEPI) a venda da fábrica e a remitir unha proposta en termos xerais “nun prazo máximo de dúas semanas“. Celebraranse mesas multilaterais informativas sobre o proceso cos sindicatos e as Administracións, Xunta de Galicia e Goberno central, cunha periodicidade mensual.

CUBAS DE ELECTRÓLISE

Ademais, poderá parar “unicamente as cubas de electrólise as que impliquen un risco para as persoas ou para as instalacións”. Así, queda blindada a maquinaria operativa a 18 de xaneiro, non así aquela que foi apagada nun período anterior.

Alcoa tamén se compromete a “manter o número de cubas activas por riba do límite técnico de ambas series, procedendo, en caso necesario, á brascaxe e reparación ou substitución para alcanzar o mencionado límite técnico”. Ademais, Alcoa non poderá adoptar “ningunha medida extintiva de carácter colectivo“.

No tocante ao persoal, o acordo inclúe que Alcoa conte con “recursos adicionais” segundo “as necesidades produtivas e organizativas de produción e mantemento do complexo industrial” ata “alcanzar os efectivos necesarios“.

Ademais, a empresa deberá incorporar a arredor de 40 temporeiros pendentes de contratos de relevo, segundo o acordo de febreiro de 2019 polo que os sindicatos aceptaron prexubilacións e a opción de recolocar traballadores de Avilés e A Coruña.

VIXENTE ATA ESA DATA

Para todas estas cuestións, ambas partes acordan facer “un seguimento” a través de “reunións específicas”.

O pacto permanecerá vixente ata o 30 de abril e os sindicatos poderán reactivar o paro en diante “nas mesmas condicións” de non haber acordo para amplialo, podendo ambas partes rompelo se a outra incumpre o acordado.

HORARIOS DO REFERENDO

Os horarios do referendo, que se celebrará entre mañá e o venres 22, serán os seguintes: quenda B, día 19, de 22.00 a 00.00 horas; día 20, de 12.00 a 16.00 horas e de 22.00 a 00.00, quendas A, C e E. Finalmente, o día 22, de 10.00 a 12.00 horas, quenda D e JN.

MAROTO PIDE “ALTURA DE MIRAS”

Pola súa banda, en Madrid, a ministra de Industria, Turismo e Comercio, Reyes Maroto, pedira a Alcoa e aos sindicatos “altura de miras” para un acordo que garanta o futuro para a planta de San Cibrao, xa que “hai terceiras empresas e provedores afectados pola súa falta de produción”.

No foro ‘Ágora‘ organizado por ‘El Economista‘, Maroto afirmou que agora é necesario “un marco de tranquilidade e paz laboral” para negociar a venda da factoría á SEPI, xa que “tamén hai outras plantas prexudicadas polo prolongación desa falta de acordo”.

A titular de Industria reiterou que o compromiso do Goberno co mantemento das capacidades produtivas e do emprego “está máis que referenciado”, asegurando que agora hai que “sentar a negociar” para plasmar esa vontade de venda manifestada por Alcoa.

Para iso, pediu “altura de miras” a todos os actores implicados nunha solución para Alcoa e destacou que hai unha sentenza que “dá tranquilidade” e que “marca un obxectivo compartido”, que é que as cubas da factoría non se parasen e que “ese conflito se converta en solucións”.

Así, mostrou a súa confianza en que, despois do intento errado de setembro, a vontade de Alcoa sexa que está vez “si vende a planta e se poida atopar unha solución a este conflito que dura xa demasiados meses”.

RESPONDE ÁS CRÍTICAS AO ESTATUTO

Por outra banda, Maroto afirmou que o compromiso do Goberno para abaratar a factura eléctrica tanto dos consumidores electrointensivos como dos domésticos é “indiscutible“, ademais de garantir a cobertura para os consumidores vulnerables.

Neste sentido, indicou que este Goberno leva traballando máis de dous anos e medio para garantir que a enerxía “sexa accesible”, cunha rebaixa na factura dun 40% nese tempo.

“E seguiremos traballando, xa que sen dúbida é un elemento de competitividade que nos preocupa e ocupa e demos as certezas para iso”, dixo.

No que respecta ao sector industrial, Reyes Maroto defendeu a aposta do Goberno por incrementar o seu peso e, para iso, apuntou a necesidade de contar cun Pacto de Estado e unha nova Lei de Industria que permita dar unha “estabilidade de máis dunha lexislatura”.