O Comité Clínico da Xunta decidiu declarar o nivel de restrición media en Viveiro e Cervo. Unha situación que se produce polo aumento da incidencia da covid nos últimos días e implica unha redución no aforo dos eventos deportivos, da piscina, da biblioteca e do teatro que pasará a ser do 30%.

Tamén implicará un cambio na hostalería e restauración. Os establecementos poderán prestar servizos de recollida no local e consumo a domicilio, de entrega a domicilio, de terraza co 50% do aforo e tamén servizo no interior cunha ocupación do 30%. Non se poderá prestar servizo na barra.

O horario de peche ao público será ás 23:00 horas. Os restaurantes disporán da opción de ampliar o seu horario ata as 1:00 horas exclusivamente para o servizo de ceas, sempre que cumpran os requisitos establecidos e sen que poidan admitirse novos clientes a partir das 00.00 horas.

Os establecementos poderán prestar servizos de recollida no local e consumo a domicilio ou ben servizo de entrega a domicilio ata as 1.00 horas. Non se producen cambios nas limitacións dos grupos de persoas, que se manteñen igual que ata o momento. Segundo a información facilitada este cambio de nivel entraría en vigor este sábado, 22 de maio, estando neste momento á espera da publicación correspondente no Diario Oficial de Galicia.

Dende o goberno municipal de Viveiro solicítase a todos os veciños e veciñas a máxima prudencia e o cumprimento de todas as medidas e limitacións establecidas, coa finalidade de evitar un incremento de contaxios e que a situación epidemiolóxica “mellore canto antes e poder volver, de novo, ao nivel anterior”.