O presidente do comité de empresa de Alcoa San Cibrao, José Antonio Zan, confía en “ter canto antes” o acordo “xa firme” coas compañías Capital Energy e Greenalia para fornecer electricidade de forma estable á planta da Mariña durante 10 anos.

En declaracións tras unha nova reunión de seguimento para o futuro da fábrica, celebrada en Madrid, Zan lembrou que estaba fixado o 20 de maio como data “tope” para que o acordo con esas dúas compañías estea pechado, e así “poder ter uns parques eólicos dos que falar e unha garantía de futuro”.

Estes acordos forman parte dos que conta Alcoa con diferentes compañías para conseguir un prezo estable e máis barato para a próxima década. Pero Zan avisa de que falta a outra parte, a regulada polo Goberno central, ao que pide aumentar “ao máximo” as compensacións por CO2, pois sinala que ten que cumprir ese compromiso.

Paralelamente, o presidente do comité informou que a empresa “vai empezar a pasar” os primeiros custos dos investimentos por enxeñaría, de forma que se van liberar os fondos comprometidos para esas actuacións. Respecto diso, augura que os “investimentos van chegar a tempo”.

Por outra banda, emprazou a empresa a “cambiar a fórmula” e “deixar de xudicializar todos os problemas”. Sobre este extremo, referiuse á situación de comedores e instou a Alcoa a “sentar a negociar” e “chegar a acordos”.